Ukraina Tışqı işler nazirligi Rusiyeden işğal etilgen Qırımda Qırımtatar Milliy Meclisiniñ reis muavini Ahtem Çiygoznıñ taqip etilmesini toqtatmağa talap ete. Nazirlikniñ matbuat kâtibi Maryana Betsa onıñ davasını siyasiy dep adladı.
«Sözde «diñlevler» Çiygoz davasınıñ siyasiy sebeplerini daa bir kere köstere. Oyun toqtatılmasını, Ahtemniñ azat etilmesini talap etemiz», – dep yazdı Betsa mart 28-de aqşam Twitterde.
Çiygoz davasınıñ daa bir oturışı mart 29-da işğal etilgen Qırım mahkemesinde keçirile.
Qırım Yuqarı mahkemesi Ahtem Çiygoznıñ apis müddetini iyül 8-ne qadar uzatqan edi.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Şurasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqanlar, şu cümleden «Rus Birligi» firqası, miting iştirakçilerine qarşı çıqqan edi.
