Link açıqlığı

Kreml kontrol etken Qırım Yuqarı mahkemesi Qırımtatar Milliy Meclisiniñ reis muavini Ahtem Çiygoznıñ davası boyunca mart 28-de keçirilgen oturışında imaye şaatı Seyran Egamberdiyevni sorğuğa çekti. Şaat 2014 senesi fevral 25-26 vaqialarını añlatıp, Çiygoznıñ qabaatını tasdıqlamadı. Bunı Çiygoznıñ advokatı Nikolay Polozov tarif etti.

«Anda (Qırım Yuqarı Şurasınıñ içki azbarında – QA) Ahtem Çiygoznı kördi, o, bir de bir işaret köstermedi, emir bermedi ve çağıruvlar yapmadı. Bundan ğayrı, kün boyunca miting vaqtında onıñ yanına emir ya da çağıruvlarnen kimse kelmegen edi», – dep qayd etti Polozov.

Advokatnıñ aytqanına köre, şaat, militsiya hadimleri binanıñ içki azbarını terk etken soñ çatışma başlağanını añlattı.

«O, Rusiyege qoltutqan miting iştirakçileri tarafından Ukrainağa qoltutqanlarğa cam şişeleri, plastik şişeler atılğanını körgen edi. Aynı vaqıtta, qayd etkenine köre, Ukrainağa qoltutqan miting iştirakçilerinden iç birisi evelden bir de bir zorbalıq aletini azırlamağan edi: tayaq, armatura, lesker tayaqları ve ilâhre», – dep qoştı Polozov.

Diñlevler çarşenbe künü, mart 29-da, devam etecektir.

Qırım Yuqarı mahkemesi Ahtem Çiygoznıñ apis müddetini üç ayğa, iyül 8-ne qadar uzatqan edi.

Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, şu cümleden «Rus Birligi» firqası, miting iştirakçilerine qarşı çıqqan edi.

Rusiye mahkemesi iyül 20-de qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.

XS
SM
MD
LG