Qırğızistan deputatlarınıñ işğal etilgen Qırım ziyareti «eki taraflı munasebetlerniñ añlaşma-uquq bazasınıñ qaidelerini ve vaqtınca işğal etilgen Qırım Muhtar Cumhuriyeti ve Aqyarğa kiriş qaidelerini boza». Bu aqqında Ukraina halq deputatı, Qırımtatar Milliy Meclisiniñ reisi Refat Çubarovnıñ Ukrainada Qırğızistan işlerini vaqtınca baqqan Batırkan Sırgabayevge yazğan mektübinde aytıla.
Vesiqa kopiyasını Refat Çubarov mart 28-de Facebook saifesinde aydınlattı.
«Rusiye işğalcileri yarımadanıñ tamır halqı qırımtatarlarnı açıq sürette ve sert bir şekilde taqip etken vaqıtta Qırğızistan parlamenti deputatlarınıñ qanunsız ziyaretleri utanmaz bir şey olğanını aytmağa da kerekmey. Vaqtınca işğal etilgen Qırımda Rusiye işğalcilerine qarşılıq köstergen Ukraina vatandaşlarınıñ itibarını ve Ukraina devletini kimse aqaretlep olamaz», – dep aytıla mektüpte.
Çubarov Batırkan Sırgabayevni ukrain kütleviy haber vastalarında çıqışta bulunıp, Qırğızistan deputatlarınıñ Qırım ziyaretini ukrain cemaatçılığına resmiy şekilde añlatmağa çağırdı.
Batırkan Sırgabayevniñ Qırımtatar Milliy Meclisiniñ reisi yazğan mektübine bergen bir de bir cevabı şimdilik yoq.
Qırğızistandaki Ukraina elçisi Mıkola Doroşenko bazarertesi künü, mart 27-de, Qırğızistan Tışqı işler nazirligine yerli siyasetçilerniñ işğal etilgen Qırım ziyaretlerinden sebep diplomatik narazılıq bildirdi.
O, «Qırğızistan Tışqı işler nazirligine daa bir kere barıp kelmege» kerek olacağını ayttı. Yaqında bu memleketniñ daa bir siyasetçisi İrina Karamuşkina Qırımnı ziyaret etti. Elçi «Qırğızistan akimiyeti eşitip, belli tedbirler alır», dep ümüt ete.
Qırğızistan deputatları mart 18-21 künleri diger memleketlerniñ siyasetçileri eyyetiniñ erkânında işğal altındaki Qırım yarımadasında olıp keçken tedbirlerde iştirak etti. Bunı Doroşenko Radio Azattıkqa bildirdi.
Qırğızistan parlamentiniñ matbuat kâtibi İbragim Nurakun uulu Radio Azattıkqa bildirgenine köre, resmiy şekilde yarımada ziyareti olmadı, amma ayrı deputatlar Qırımnı ziyaret etkendir.
Ukraina Tışqı işler nazirligi çetel vatandaşları ve vatandaşlığı olmağan şahıslarnı Qırım ziyaretlerinden vazgeçmege çağırğan edi. Nazirlik çetel siyasetçileriniñ Qırım ziyaretleri resmiy sayılmağanını da qayd etken edi.
