Ukraina, Poloniya ve Litvaniya parlamentlerara assambleyası Ukraina topraq bütünligine qoltutqanını bildirip, Rusiyeni Qırım işğalini toqtatmağa ve yarımadada insan aqlarını bozmamağa çağırdı. Bu aqqında Ukraina Yuqarı Radası derc etken vesiqada aytıla. Onı Assambleya toplaşuvınıñ neticelerine köre Ukraina Yuqarı Radasınıñ reisi Andriy Parubiy, Litvaniya Seyminiñ reisi Viktoras Prantsketis ve Poloniya Senatınıñ reisi Stanislav Karçevskiy imzaladılar.
«Parlamentlerara assambleya bildire ki, Rusiye Federatsiyası Minsk añlaşmalarını tolusınen yerine ketirgenine qadar ve Qırım işğali yekünlegenine qadar Rusiyege qarşı kirsetilgen sanktsiyalarnı saqlap qalmaq içün sebep bar», – dep aytıla vesiqada.
Ukraina Yuqarı Radasınıñ reisi Andriy Parubiy Varşavadaki «Ukraina-Poloniya-Litvaniya» parlamentlerara assambleyasınıñ toplaşuvında çıqışta bulunıp bildirdi ki, Rusiye işğal etilgen yarımadada nukleer silânı yerleştirmek içün arbiy infrastrukturanı azırlay.
O, Rusiye akimiyeti yarımada sakinleriniñ aqları ve serbestligini bozğanına ve ukrain ve qırımtatar tilli kütleviy haber vastalarına basqı yapılğanına diqqatnı celp etip, Qırımnı qorqu ve qanunsız alanı dep adladı.
«Ukraina – Poloniya – Litvaniya» parlamentlerara assambleyası mart 27-28 künleri Varşavada keçirildi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
