Link açıqlığı

Rusiye işğal etkeni Qırımda özek silânı yerleştirmek içün arbiy infrastrukturasını azırlay, ayrıca Sovetlerden qalğan özek silâ toldurıcılar tutılğan yerlerni yañıdan tikley ve yañılata. Ukrainanıñ Poloniyadaki temsilciliginiñ matbuat hızmeti bildire ki, bunı Varşavada «Ukraina – Poloniya – Litvaniya» Parlamentler arası Şurada Ukraina Yuqarı Radasınıñ başı Andriy Parubiy dedi.

«Özek silânı taşıyıcıları (raketa sistemaları ve uçaqlar) aqqında desem, olar endi yarımadada barlar. Rusiye Qırımnı, onıñ qara orduları, AAQ ve ADQ yerleşecek büyükten büyük arbiy mekânğa çevire», – dedi Parubiy.

Ondan da ğayrı o Rusiye akimiyeti yarımada sakinleriniñ aqlarını ve serbestligini bozğanına, ukrainca ve qırımtatarca çalışqan kütleviy haber vastalarını zulumğa oğratqanına diqqat çekti, Qırımnı ise o qanunlar çalışmağan qorqu mekânı dep adlandırdı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG