Rusiyeniñ Qırımdaki Taqiqat komiteti, bir sıra qırımtatarlarnen bağlı mahkeme davalarında iştirak etken Qırımlı advokat Emil Kurbedinovnı körüşüvge çağırdı. Bunı o Facebookta «Crimea SOS» saifesinde yayınlanğan video-muracaatında haber etti.
«Bugün ve tünevin Rusiyeniñ Qırımda çalışqan Taqiqat komitetiniñ taqiqatçısı maña telefon açtı ve men mahkemeniñ başlanğıç taqiqatnıñ malümatını aşkâr etkenim içün maña qarşı başlanğıç taqiqat teşkirüvi yapılacağını bildirdi», – tarif etti Kurbedinov.
Advokat, onı angi işlerden biri içün teşkireceklerini ve kim olaraq onı çağırttırğanlarını açıqlaycaq resmiy davet talap etti.
O, Qırım Advokatar palatasını olğan vaziyetten haberdar etecegini ayttı.
«Elbette, men bunı öz faaliyetim ve cemaat meydanlarında bir çoq şey aytqanımnen bağlayım», – dedi Kurbedinov.
Advokatnıñ sözlerine köre, onıñ aşkâr etkeninden iç bir şey sır sır degil edi. Kurbedinov dey ki, bu yañılıq – «zenaat faaliyetinen bağlı basqınıñ nevbetteki usulı» ola.
Advokat Emil Kürbedinov yanvar 26 künü Bağçasarayda Rusiyeniñ silâlı hızmetleri tarafından yaqalandı. O qırımtatar faali Seyran Saliyevniñ evine, adliyeviy yardım bermek içün kete edi. Aqmescitniñ Demiryol rayon mahkemesi advokat Emil Kürbedinovnı Memuriy qanun bozuvları Kodeksiniñ 20.3 maddesi (Natsist timsalleriniñ teşviqatı ve açıq numayışı) boyunca qabaatlı olaraq tanıdı ve 10 künge apis etti. Bunıñ sebebi – Kürbedinov «Vkontakte» saifesinde 2013 senesi Aqmescitte «Hizb ut-Tahrir» mitingi aqqında yazını paylaşqanı oldı.
Kürbedinov siyasiy davalarnı baqqan eñ eyi Qırım advokatlarından birisidir. O ve zenaatdaşları apiske alınmasını advokat faaliyetine keder etmek ıntıluvı olaraq tanıylar.
