Link açıqlığı

Saatnıñ esas haberi

Advokat: Qırım mabuslarınıñ Rusiye apishanelerine avuştırılması – qoranta yaşayışına qarışuvdır


Advokat Edem Semedlâyev, arhiv fotoresimi
Advokat Edem Semedlâyev, arhiv fotoresimi

Üç mabusnıñ Qırımdan yarımadadan uzaq bir yerge yollanılması – olarnıñ aile munasebetlerine qarışuvdır. Bunı mart 25-de advokat Edem Semedlâyev «Qırım birdemligi» birleşmesiniñ körüşüvinde bildirdi.

«Yaqında Avropa insan aqları mahkemesi Rusiye tarafından mabuslarnıñ yaşağan yerlerinden uzaqqa yollanılmasınen bağlı bir beyanat yaptı. Anda bunı qoranta yaşayışına qarışuv olaraq tanıp, aileler qanunlar belgilegen qısqa körüşüvlerge bile izin alamağanı qoranta munasebetlerini sıñırlay, dep bildirdiler», – dep tarif etti toplaşuvda Edem Semedlâyev.

Onıñ qoşqanına köre, zenaatdaşı Emil Kürbedinov ile beraber mabuslarnıñ Qırım tışındaki apishanelerge avuştırılmasından şikâyet etecek.

«Ferat Sayfullayev, Rustem Vaitov ve Nuri Primovnıñ uzaq apishanelerge yollanılmasından Avropa insan aqları mahkemesine qadar şikâyet etecekmiz, yerli mahkemelerge işançımız yoq», – dedi Edem Semedlâyev.

Advokatnıñ bildirgenine köre, mahküm etilgen ve apishanege yollanılğan üç insannı unutmayıp, olarğa yardım köstermege devam etecekler.

İyün 1-den berli Qırım musulmanlarınıñ «Hizb ut-Tahrir» ile alâqalarını baqqan Rostov-na-Donu şeerindeki Şimal-Kavkaz bölge arbiy mahkemesi keçken sene sentâbr 7-de üküm çıqardı. Oña binaen, aqyarlı Ferat Sayfullayev, Rustem Vaitov ve Nuri Primov beş yıl apis cezasına mahküm etildi.

XS
SM
MD
LG