Rusiyeniñ bir sıra şeerlerinde, mart 26 künü qabarçılıqqa qarşı mitinglerde tutılğan vatandaşlarğa qarşı davalarnıñ baqılması başlandı. Bunı Radio Svoboda bildire.
Krasnodarda mahkemeler yaqalanğan 17 adamğa ceza qararını çıqardı. Olarnıñ çoqusına üçten 15 künge qadar apis cezası berildi. Eki adam bir ve 16 biñ ruble para cezasını aldı.
Volgogradta politsiya hadimine ücüm etkeninde qabaatlanğan Aleksey Baldinov qabaatını tanıdı, dep haber ete vilâyet taqiq komitetiniñ idaresi. Mahkeme oña ceza qararı muzakere ete.
Nijniy Novgorodta qabarcılıqqa qarşı mitingte iştirak etken beş mektep talebesiniñ ana-babasını çağına yetmegen balanıñ terbiyesini becermegeninde qabaatlı tanıdılar. Umumen Nijniy Novgorodta 44 insan yaqalandı. Olardan 38-ne qarşı, miting keçirilmesiniñ qaidelerini bozması ve politsiya hadimlerine rşayet etmegenleri boyunca protokol yazıldı.
Mahaçkala akimiyeti qabarcılıqqa qarşı mitingte 150 isan tutılğanını red ete. Bundan evel ise kündüz uquq qoruyıcılar böyle malümat bergen ediler. Şeer idaresiniñ sitesinde qabarcılıqqa qarşı mitingte 50-den az insan iştirak etkenini bildireler.
Rusiye tarafından işğal etilgen Qırımda Aqmescitte narazlıq aktsiyasınıñ reberi Dmitriy Kisiyevke mahkeme 10 kün apis cezasını berdi. Diger Qırımlı faal Aleksey Yefremov, politsiyağa boysunmağanı içün, mahkeme tarafından 500 rublege para cezasını aldı.
Rusiye prezidentiniñ matbuat-kâtibi Dmitriy Peskov, Moskvada çağına yetmegen miting iştirakçilerine para vade ete ediler, dep ayttı.
Mart 26 künü Rusiyeniñ onlarce şeerlerinde qabarcılıqqa qarşı mitingler ötkerildi. Olarda onlarce ve biñlerce insanlar iştirak etti. Rusiye paytahtı Moskvada ruhsetsiz usulnen aktsiya Tverskaya soqağında kezüv şekilinde keçti. Farqlı malümatlarğa köre, oña 8-den 20 biñge qadar insan qoşıldı. Yaqalanğavlarnı nezaret etken Rusiyeli «OVD-İnfo» portalınıñ malümatına köre, aktsiya iştirak etken 1030 adam tutıldı.
