Qırımdaki Yuqarı mahkeme Qırımtatar Milliy Meclis reisiniñ muavini İlmi Ümerovnıñ davasınıñ baqılmasını Bağçasaray rayon mahkemesinden alıp Aqmescit rayon mahkemesine yükledi. Bunı İlmi Umerov özü haber etti.
Umerov: «Bağçasaray rayon mahkemesi, men çoq vaqıt devamında rayon yolbaşçısı olğanım sebebinden, ve sanki bazı mahkemecileriniñ öz menfaatları ola bileceginden saqınıp, menim davamnı baqmağa razı olmadı. Qırım Yuqarı mahkemesi, bu davanı Aqmescit rayon mahkemesi baqacağı aqqında qarar çıqardı, ve bu qararğa itiraz bildirmek içün 10 künümiz bar», – dedi Umerov.
Mart 21 künü Kreml nezaretindeki Qırım prokuraturasında Meclis reisiniñ muavini İlmi Umerovğa qarşı cinaiy işniñ qabaat neticesini taqdim ettiler.
İlmi Umerovnıñ qızı Ayşe 2016 senesi dekabr 30-da bildirdi ki, babası Rusiye maliye monitoringi federal hızmetiniñ saytında derc etilgen terrorist ve ekstremistler cedveline kirsetilgen. Onıñ nomerası 5826.
Evel haber etilgen edi, dekabr 29-da İlmi Ümerov Qırım mahkemesiniñ Qırımtatar Milliy Meclisiniñ toplaşuvında iştirak etkeninden oña bergen para cezasını ödep olamadı.
İlmi Umerovğa qarşı ekstremizm maddesi boyunca FSB tarafından cinaiy iş açılğanını 2016 senesi mayıs 12 künü Qırımnıñ sabıq prokurorı Natalya Poklonskaya beyan etken edi.
Meclis reisi muavininiñ yaqalanuvı, tintüvi ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada razonans çıqarğan edi.
