Link açıqlığı

«Bizim balalar» birleşmesi vesayeti altındaki qorantalarğa teklifte bulundı


Elzara İslâmova körüşüvde, 2017 senesi mart 25 künü

Mart 25-de Qırımda «Bizim balalar» cemaat birleşmesi «Qırım birdemligi» areketine birleşken Qırımnıñ siyasiy mabusları ve ğayıp olğanlarnıñ qoranta vekillerinen körüşti. Bunı Qırım.Aqiqat mühbiri bildire.

«Bu ay, er vaqıt olğanı kibi, er bir balağa beşer biñ ruble beremiz. Amma hasta balalarımız bar, olarğa daa çoq yardım kösterecekmiz», – dep bildirdi «Bizim balalar» birleşmesi şurasınıñ azası Elzara İslâmova.

Cemaat faaliniñ bildirgenine köre, «Bizim balalar» birleşmesi vasiyligi altındaki balalarğa yardım etmeknen beraber olarnıñ ana-babalarına da iş tapmağa yardım etmege azır.

«Bu qorantalarnıñ hususiyetlerini bilemiz, olarnı aqaylar baqa edi, qadınlar ise balalarnı baqıp, evde otura ve çoqusı allarda çalışmay edi. Şimdi fondumız bergen para bile pek az. Bunıñ içün istegen qadınlarğa özleri cedvelini tizecek iş tapmağa yardım etmege azırmız», – dep tarif etti İslâmova.

Onıñ qayd etkenine köre, mezkür iş er biriniñ istegini köz ögüne alacaq. Bu sebepten «Bizim balalar» fondu mahsus anketanı azırladı.

«Bizim balalar» leyhası keçken sene mubarek Ramazan ayında başlatılğan edi. Leyha teşebbüsçisi jurnalist Lilâ Bucurova oldı. Onıñ maqsadı – Qırımnıñ siyasiy mabusları ve ğayıp olğan ya da qaçırılğan qırımtatarlarnıñ qorantalarına yardım etmektir. Leyha yalıñız maddiy yardımnı qabul etmey. Leyha çerçivesinde siyasiy taqiplerge oğrağan insanlarnıñ balalarına yardım kösterile: para, urba ve oyuncaqlar, raatlıq ve tedaviylev, psihologik yardım ve ilâhre.

XS
SM
MD
LG