Link açıqlığı

«Qırım birdemligi» birleşmesi faaliyetiniñ yıllığını qayd etti


«Qırım birdemligi» birleşmesiniñ on ekinci toplaşuvı, 2017 senesi mart 25 künü, Bağçasaray

«Qırım birdemligi» cemaat birleşmesi mart 25-de Bağçasarayda on ekinci toplaşuvını ötkerdi. Bunı Qırım.Aqiqat mühbiri bildire.

«Qırım birdemligi» birleşmesi bar, bizni tanıylar, bizni eşiteler. Hatırlatayım. Qırım siyasiy mabuslarınıñ advokatları köstergen teşebbüsleri ile aprel 9-da ilk sefer Aqyarda mahküm etilgenlerniñ qorantalarınen körüştik. Ğayeni begenip, ileride bunıñ kibi körüşüvler keçirmege qarar aldıq. Mayısta birleşmeniñ adı peyda oldı – «Qırım birdemligi», bizge er ceetten kelişti. Bir yıldan berli birleşme çalışa», – dep ayttı toplaşuvda Qırım insan aqları bağ gruppasınıñ koordinatorı Abdureşit Cepparov.

Advokat Edem Semedlâyevniñ bildirgenine köre, birleşme yalıñız Qırım siyasiy mabuslarınıñ soy-sopları içün açıq degil.

«Keçken sene aprel ayında dört kişi apiste yatqan edi, şimdi bu sayı bayağı arttı, birleşmemizge lâqayt olmağan insanlar qoşulacağına ümüt etip, ileride apiste yatqanlarnıñ sayısı artmaycağına işanamız. Birleşme bir maqsadnen quruldı, şimdi ise qırımtatarlarnıñ diger problemlerine de seslene bile», – dep qayd etti toplaşuvda Semedlâyev.

2016 senesi aprel 9-da Aqyara Qırım insan aqları bağ gruppası «Hizb ut-Tahrir» teşkilâtına bağlı olmasınen qabaatlanğan musulmanlarnıñ soy-soplarını topladı. Soñra «Qırım birdemligi» Qırımnıñ diger siyasiy mabusları, em de qaçırılğan ve ğayıp olğan musulmanlarnıñ aileleri içün öz qapularını açtı. Mında advokatlar da bar edi.

XS
SM
MD
LG