Herson devlet universiteti 2017 senesi Qırım mektepleriniñ mezunlarını imtiyazlar esasında qabul etecek aliy oquv yurtlarından biri olacaqtır. Bunı universitet rektorı Vasiliy Stratonov Qırım.Aqiqatqa bildirdi.
Onıñ aytqanına köre, al-azırda biñ qırımlı abituriyentke Herson, Zaporojye, Nikolayev ve Odessa vilâyetlerindeki imtiyazlar esasında oqumağa kirmege imkâye berecek devlet programması azırlanıla.
«Programmanı azırlağan insanlarğa tekliflerimizni bildirdik. Bilgenime köre, qırımlılarğa esas Ukrainadaki aliy oquv yurtlarına oqmağa kirmek içün ayrı şartlar qoyulacaq, olar tışqı mustaqil imtianlarnı bermeyip kire bilecekler. Qırım studentleri bücet parasına oquycaq, olarğa yataqhanelerde yerler de ayırılacaq», – dep ayttı Vasiliy Stratonov.
Onıñ qayd etkenine köre, azırlanğan devlet programması – «qırımlılar içün aliy oquv yurtlarında bedava oqumağa imkân bergen Rusiyeniñ yapqan areketlerine berilgen cevaptır».
Herson devlet universitetiniñ rektorı bildirgenine köre, al-azırda aliy oquv yurtında keçken sene oquşqa başlağan üç Qırım studenti tasil ala.
2016 senesinden itibaren esas Ukrainadaki aliy oquv yurtlarına Qırımda orta tasil alğanlar da kire bile. Ukraina tasil ve ilim nazirligi bu maqsadnen «Qırım – Ukrainadır» adlı 12 tasil merkezini açtı. Qırım abituriyentleri Tışqı mustaqil imtianlarını bermeyip, Ukrainanıñ aliy oquv yurtlarına oqumağa kire bileler.
