Kreml nezaretndeki Qırım parlamentiniñ deputatı Yüriy Gempel, Qırımğa Almaniyadan iş adamları ve siyasetçiler taqımı kelgenini beyan etti. Bunı «RİA Novosti Krım» haber ete.
Gempel dey ki, taqımda «taşınmaz mülk suallerinen oğraşqan» 7 alman iş adamı ve regional seviyede çalışqan siyasetçiler bar.
«Al-azırda eyyet Yaltada Livadiya sarayında buluna. Olar sadece çarnıñ ailesi aqqında umumiy tarihinen tanış olsunlar dep degil de, cenkten soñ dünyanıñ taqdirini çezgen Yalta konferentsiyasınıñ keçirilgen yerini de körsinler dep, biz olarğa ekskursiya teşkil ettik. Asılında, zanımca, Rusiye ve Qırımğa qarşı sanktsiyalarnıñ lâğu etilmesi aqqında qararlar qabul etmek içün Yaltada daa bir konferentsiya keçirilmek kerek», – dedi Gempel.
Onıñ sözlerne köre, bir afta qadar devam etecek ziyaret programması çerçivesinde Almaniyalı müsafirler Qırımnıñ tarihınen tanış ola bilirler, cemaat teşkilâtlarınen körüşip olurlar, alman iş adamları içün togerek masalar ötkerilecek, Kreml nezaretindeki Qırım parlamentniñ yolbaşçısı Vladimir Konstantinovnen ile körüşüv ve «Kontslager «Krasnıy» abidesiniñ ziyareti yapılacaq.
Ukraina Tışqı işler nazirligi bundan evel, çetel eyyetleriniñ Qırımğa yapqan ziyaretleri resmiy sayılmağanını beyan etken edi. Ukrain nazirligi iyül 25-de muracaatını aydınlatıp, çetel vatandaşları ve vatandaşlığı olmağan insanlarnı Qırımnı qanunsız usulnen ziyaret etmekten vazgeçmege çağırdı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
