Link açıqlığı

Aqyarlı Zeytullayev boyunca mahkeme qararı, kelecekte buña oşağan davalarğa tesir etecek – advokat


Adliyeci Emil Kurbedinov ve «Hizb ut-Tahrir davasınıñ» mabusı Ruslan Zeytullayev

Qırımda terroristik bölükniñ teşkil etkeninde qabaatlanğan Aqyarlı Ruslan Zeytullayev boyunca mahkemeniñ alacaq qararı kelecekte aynı maddeki qararlarğa tesir etecek. Böyle fikirni mart 25 künü advokat Emil Kurbedinov seslendirdi.

«Bu arada Rostovda keçken Ruslan Zeytullayevniñ mahkemesi pek müim. Ağır maddede bu birinci tecribemiz, çünki Ruslannı bir añlaşılmağan bir zümreni teşkil etkeninde qabaatlaylar. Tezden mahkeme öz qararını çıqaracaq ve kelecekte bu aynı maddedeki qararlarğa tesir etecek», – dedi Kurbedinov.

Advokatnıñ sözlerine köre, mahkeme ketişatında «davanıñ bir sımarış olğanı açıqtan körüne. Ceza qararını çıqarmağa aşıqalar».

«Men bellesem, iyülge qadar Ruslan daa Rostovda bulunacaq, iyülniñ soñunda ise onı Rusiyeniñ bir de bir apishanesine yollarlar. Öz şaatlarımıznı çağırğanımız eki üç mahkeme toplaşuvı qaldı. Mart 29-30 künleri Ruslan bir qaç beyanat berecek, mahkemede bir de bir kütleviy haber vastası olsa, pek yahşı olacaq», – dep qoştı Kurbedinov.

Keçende Rostovda mahkeme «Hizb ut-Tahrir davasınıñ» mabusı Zeytullayevniñ imayesinden kelgen muracaatlarnıñ 8-den ziyadesini red etti.

Ruslan Zeytullayevniñ davası boyunca nevbetteki mahkeme toplaşuvı mart 29 ve 30 künleri olacaq. Toplaşuvlarda imaye tarafınıñ şaatları ifade berecekler.

Rostov-na-Donu şeerindeki Şimal-Kavkaz bölge arbiy mahkemesi, iyün 1-de mahkemeni başlap, sentâbr 7 künü «Hizb ut-Tahrir» ile alâqalarınen qabaatlanğan Qırım musulmanlarınıñ işi boyunca ükmüni çıqardı. Mahkeme qararına binaen, Aqyar sakini Ruslan Zeytullayev «Hizb ut-Tahrir» bölügini teşkil etti dep yedi yılğa, Ferat Sayfullayev, Rustem Vaitov ve Nuri Primov ise beş yılğa qadar apiske alındı.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

Ukraina Tışqı işler nazirligi, Rusiye akmiyeti tarafından yapılğan «nevbetteki safsata mahkemesini» takbih etti ve Rusiyeden deral ükümüni lâğu etmesini talap ete.

XS
SM
MD
LG