Link açıqlığı

İşğal etilgen Qırımdan esas Ukrainağa köçken Vernadskiy adına Tavriya milliy universitetinde mart 24-de halqara Navrez bayramı qayd etildi, dep bildire Qırım.Aqiqat mühbiri.

Tedbirge qırımtatar halqınıñ lideri Mustafa Cemilev, Tavriya universitetiniñ rektorı vazifelerini eda etken Vladimir Kazarin, Birleşken Milletlerniñ qaçaqlar meseleleri Yuqarı komissarı temsilcisiniñ muavini Noel Kalgun, Tataristan ve Özbekistan qaçaqları keldi.

«Qırımtatarlar Navrez bayramını pek qayd etmey, amma bu da tarihımıznıñ bir parçası ola. Bu yañı başlanğıçnıñ bir timsali ola, şu sebepten UNESCO bu künni halqara bayram olaraq belgiledi. Eñ eyisini istep, Vatan Qırımğa qaytmamızğa azırlıq körmege tileyim. Mında işğalcilerden azat etilecek Qırım içün mütehassıslarnı azırlaymız», – dep ayttı qırımtatar halqınıñ lideri Mustafa Cemilev.

Ansambller oyun töşedi ve yır yırladılar, ananeviy qıyafetler numayış etildi. Bayram soñunda musafirler şarqiy memleketlerniñ aşları ile sıylandı.

Birleşken Milletlerniñ qaçaqlar meseleleri Yuqarı komissarı temsilcisiniñ muavini Noel Kalgun emin ki, bu merasim «farqlı medeniyet, farqlı halq ve farqlı dinlerni birleştire».

«Bayramlar evnen bağlı ola, bugün dünyada 65 million insan evini terk etmege mecbur olğanını unutmamaq pek müim. Ukrainada üç biñden ziyade qaçaq yaşay ve bir qaç biñ kişi bu statusnı almaq içün muracaat etti. Bir çoq qaçaq bu bayram qayd etilgen memleketten keldi.

«Ümüt etem ki, bu festival ev ve meskenler yıqtırılsa da, ananeler öyle qolay yoq etilmeycegini hatırlatır», – dep qayd etti Kalgun.

Navrez «âñı kün» demektir, onı küneş taqvimine köre yañı yıl dep adlandıralar. «Baar ve quvanç kününi» qayd etmek – şarqiy halqlarnıñ qadimiy milliy ananesidir. Bayramdan evel insanlarnı af ete, ev ve azbarlarnı cıyıştıra, borclarnı qaytara, yañı urba ala ve bahşışlar ediye eteler.

XS
SM
MD
LG