Rusiye kontrol etken Qırım akimiyeti Türkiyeden musafirler, şu cümleden qırımtatar diasporasınıñ vekilleri kelecegini bekley. Bunı RİA Novosti Krım Rusiye neşiri Rusiye kontrol etken Qırım ükümetiniñ milletlerara munasebetler işleri devlet komitetiniñ yolbaşçısı Zaur Smirnovnıñ malümatlarına esaslanıp bildire.
«Türkiye eyyeti kelecegine dair resmiy malümat aldıq, onıñ erkânına Türkiyede yaşağan qırımtatar diasporasınıñ onğa yaqın vekili kirecektir », – dep bildire o.
Smirnovnıñ aytqanına köre, Türkiye musafirleri gruppasınıñ başında qırımtatar medeniy birleşmeleriniñ federatsiya yolbaşçısı Ünver Sel olacaqtır.
«Mayısqa planlaştırılğan ziyaret sovetler zamanında yarımadadan sürgün etilgen qırımtatar halqı qurbanları hatırasınıñ yıllığına bağışlana», – dep ayta Qırımnıñ milletlerara munasebetler komitetiniñ yolbaşçısı.
Ukraina Tışqı işler nazirligi çetel vatandaşları ve vatandaşlığı olmağan şahıslarnı Qırım ziyaretlerinden vazgeçmege çağırğan edi.
Nazirlik çetel siyasetçileriniñ Qırım ziyaretleri resmiy sayılmağanını da qayd etken edi.
