Link açıqlığı

Qırımdaki mahkeme «Hizb ut-Tahrir davasınıñ» mabuslarına advokatlarınen aqıl tanışmaq içün yarım saat berdi


Kreml nezaretinde çalışqan Qırım Yuqarı mahkemesiniñ toplaşuvı, 24 mart 2017 senesi

Mart 24 künü işğal olunğan Qırımda Kremlniñ nezaret etkeni Yuqarı mahkemesinde «Hizb ut-Tahrir davasınıñ» Aqmescitli beş mabusına adliyecilerinen aqıl tanışmaq içün yarım saat berildi. Emil Cemadenov, Uzair Abdullayev, Teymur Abdullayev, Ayder Saledinov ve Rustem İsmailov olacaq mahkeme toplaşuvı aqqında bugün sabah haber eldılar.

Qabaatlanğan Uzeir Abdullayev ve Rustem İsmailovnıñ advokatları kelgen soñ işni baqmaq muracaatlarını mahkeme red etti. Bunı Qırım.Aqıqat muhbiri haber ete.

«Hizb ut-Tahrir davası» mabuslarınıñ soy-sop ve dostları Qırım Yuqarı mahkemesiniñ binasında
«Hizb ut-Tahrir davası» mabuslarınıñ soy-sop ve dostları Qırım Yuqarı mahkemesiniñ binasında

Mart 24 künü Kreml nezaret etken işğal olunğan Qırımnıñ Yuqarı mahkemesi «Hizb ut-Tahrir davasınıñ» beş mabusına apis cezası uzatılmasına qarşı şikâyet arizalarını baqmaq kerek.

Mart 7 künü Kreml nezaret etken Aqmescitteki Kiyev rayon mahkemesinde «Hizb ut-Tahrir davasınıñ» beş mabusı Emil Cemadenov, Uzair Abdullayev, Teymur Abdullayev, Ayder Saledinov ve Rustem İsmailovke apis cezasını arttırmağa qarar alındı. Apis cezası 2017 senesi iyün 11 kününe qadar uzatıldı.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG