Link açıqlığı

Rostovda mahkeme «Hizb ut-Tahrir davasınıñ» Zeytullayevniñ imayesinden kelgen muracaatlarnıñ 8-den ziyadesini red etti – Kurbedinov


Advokat Emil Kurbedinov

«Hizb ut-Tahrir» ile alâqalarında qabaatlanğan Qırım musulmanlarınıñ işini baqqan Rostov-na-Donu şeerindeki Şimal-Kavkaz bölge arbiy mahkemesi mart 22-23 künleri Aqyarlı Ruslan Zeytullayev davasını baqıp, imayecileriniñ bir sıra muracaatlarını red etti. Bu aqta mahkeme toplaşuvlarından soñ advokat Emil Kurbedinov haber etti.

«Bu eki kün devamında imaye tarafı öz delilerini ketirmege tırıştı. Ne içün tırıştımı? Çünki 8-den ziyade muracaat soraldı: delilerni kelirmek içün, ekspertlerni davet etmek içün, şaatmı çağırmaq içün. Faqat iç bir muracaatımız qabul olunmadı. Zanımızca, buña iç bir sebep yoq edi», – dedi Kurbedinov.

Onıñ bildirgenine köre, mart 23 künü advokatlar mahkemecilerniñ bütün taqımını çetleştirmege rica etken.

«Fikirimce, mahkeme bu davanıñ evelden belli olğan bir neticege çıqarmağa istey. Ve tartışuv qaideleri bugün qaba şekilde bozuldı. Elbette, çekilmelerine dair muracaatnı da qabul etmediler», – dep qoştı advokat.

Ruslan Zeytullayevniñ davası boyunca nevbetteki mahkeme toplaşuvı mart 29 ve 30 künleri olacaq. Toplaşuvlarda imaye tarafınıñ şaatları ifade berecekler.

Rostov-na-Donu şeerindeki Şimal-Kavkaz bölge arbiy mahkemesi, iyün 1-de mahkemeni başlap, sentâbr 7 künü «Hizb ut-Tahrir» ile alâqalarınen qabaatlanğan Qırım musulmanlarınıñ işi boyunca ükmüni çıqardı. Mahkeme qararına binaen, Aqyar sakini Ruslan Zeytullayev «Hizb ut-Tahrir» bölügini teşkil etti dep yedi yılğa, Ferat Sayfullayev, Rustem Vaitov ve Nuri Primov ise beş yılğa qadar apiske alındı.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

Ukraina Tışqı işler nazirligi, Rusiye akmiyeti tarafından yapılğan «nevbetteki safsata mahkemesini» takbih etti ve Rusiyeden deral ükümüni lâğu etmesini talap ete.

XS
SM
MD
LG