Kremliñ nezaretinde çalışqan Qırımnıñ Yuqarı mahkemesi mart 23 künü Ahtem Çiyız içün apis müddetini üç ayğa, 8 iyülge qadar uzattı. Bunı Twitterde Çiygoznıñ advokatı Nikolay Polozov haber etti.
Onıñ bildirüvinde: «Mahkeme Ahtem Çiygoznıñ apiz müddetini 08.04-ten 08.07-ge qadar, üç ayğa uzattı», – dep aytıla.
Mart 23 künü mahkeme toplaşuvında prokuror, Ahtem Çiygoz içün apis müddetini daa 3 ayğa uzatmağa rica etti, albu ki onıñ apiste bulunacaq müddeti 2 aftadan soñ bitmeli.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, şu cümleden «Rus Birligi» firqası, miting iştirakçilerine qarşı çıqqan edi.
Rusiye mahkemesi iyül 20-de qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
