İşğal etilgen Qırımda Kremlniñ nezaretinde çalışqan Yuqarı mahkemede «Çiygoz davasınıñ» çerçivesinde nevbetteki toplaşuvınıñ birinci qısımında imaye tarafınıñ şaatı, faaliyetçi Nariman Celâlnı sorğulamağa devam ettiler. Bunı tenefüste Çiygoznıñ advokatı Nikolay Polozov bildirdi.
Advokay dey ki:«O (Nariman Celâl – QA) fevral 26 künü yüz bergen adise aqqında ifadelerini berdi, Ahtem Çiygoz çoqusu vaqıt oña yaqın yerde olğanını, Ahtem Çiygoz qanunsız areketler, çağıruv yapğanını, emir ve vazifeler bermegenini ayttı».
Polozovnıñ sözlerine köre, prokuror ve mahkemeciler şaattan Qırımtatar Milliy Meclisniñ nizamı ve maileviy meselelerinen meraqlana ediler. Sorğu bitken soñ prokuror, Ahtem Çiygoz içün apis müddetini daa 3 ayğa uzatmağa rica etti, albu ki onıñ apiste bulunacaq müddeti 2 aftadan soñ bitmeli.
«İmaye tarafı işbu muracaatqa qarşı deliler azırlamaq içün vaqıt kerek olğanını bildirdi. Ve mahkeme vaqıt berdi. Öyleden soñ apis müddetini uzatılmaq muracaatı baqılmağa devam etcek», – dep qoştı Polozov.
Öyleden soñ mahkeme imaye tarafınıñ daa bir şaatını sorğulamaq kerek.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, şu cümleden «Rus Birligi» firqası, miting iştirakçilerine qarşı çıqqan edi.
Rusiye mahkemesi iyül 20-de qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
