İşğal etilgen Qırımnıñ Kreml kontrol etken Yuqarı mahkemesinde «Çiygoz davasınıñ» toplaşuvında prokuror Qırımtatar Milliy Meclisiniñ reis muavininiñ apis müddetini üç ayğa qadar uzatmağa talap etti. Bunı Çiygoznıñ advokatı Nikolay Polozov Twitterde bildirdi.
«İmaye şaatı Nariman Celâlov sorğuğa çekilgen soñ prokuror apis müddetini 3 ayğa qadar uzatmağa rica etti», – dep yazdı Polozov.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, şu cümleden «Rus Birligi» firqası, miting iştirakçilerine qarşı çıqqan edi.
Rusiye mahkemesi iyül 20-de qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
