Qırım ile memuriy sıñırdan eşyalar taşımasını sıñırlağan Nazirler şurasınıñ 1035 sayılı qararınıñ birinci noqtası qanunğa uyğun olmağanına dair mahkeme qararı işke tüşürilgen soñ işğal altındaki yarımada sakinleri eşyalarını esas Ukrainağa sıñırsız çıqara bilecekler. Bunı Helsinki insan aqları ittifağınıñ uquqçısı Maksim Timoçko Qırım.Aqiqat Radiosınıñ saba yayınında ayttı.
«Birinci noqta lâğu etilse, qırımlılarnıñ eşyalarını taşıma mevzusında er angi sıñırı olmaycaq. Olarnı red etme sebepleri qalmaycaq. Qararnıñ bu noqtası qanunsız olaraq tanıldı, amma mahkeme qararı işke tüşürilmelidir», – dep ayttı Timoçko.
Uquqçınıñ aytqanına köre, memuriy mahkeme işleriniñ al etüv tertibiniñ kodeksine binaen, mahkeme qararı derc etilgen ya da apellâtsion mahkemeniñ qararından 10 kün keçken soñ işke tüşürile.
«Davalı, yani ükümet, şikâyet arizasını berse, soñki qarar apellâtsion mahkemeniñ ükmü çıqarılğan soñ alınacaqtır. Yani dava apellâtsiyada baqılacaq. Ükümet böyle bir şikâyette bulunacağından, ne içündir, şübelenmeyim», – dep qayd etti o.
Ukraina Helsinki insan aqları ittifağınıñ aq qorçalayıcıları işğal etilgen Qırımdan şahsiy eşyalarnıñ çıqarılmasını yasaq etken Ukraina Nazirler Şurasınıñ 1035 sayılı qararınıñ birinci noqtası qanunsız olğanını isbatladı.
Kyiv bölge memuriy mahkemesiniñ Ukraina Nazirler Şurasınıñ 1035 sayılı qararını qanunsız olaraq tanımasına dair davanıñ qararı mart 20-de «Mahkeme qararlarınıñ yekâne devlet cedveli» saytında derc etildi. Ukraina Helsinki insan aqları ittifağınıñ Qırım meselelerinen oğraşqan cemaat bölüginiñ uquqçısı Anna Rossomahinanıñ aytqanına köre, işbu qarar qırımlılarnıñ er angi eşyalarını taşımağa yasaq ete.
