Link açıqlığı

Çiygoz – Lutkovskayağa: Siz tek mabuslarğa degil, Qırımdaki diger Ukraina vatandaşlarına da ümüt berdiñiz


Ahtem Çiygoz, arhiv fotoresimi

Qırımtatar Milliy Meclisiniñ reis muavini Ahtem Çiygoz ukrain ombudsmenine işğal etilgen Qırım apishanelerinden 12 mabusnıñ esas Ukrainağa berilmesinden sebep muracaat etti. Muracaat metnini Çiygoznıñ ömür arqadaşı Elmira Ablâlimova Facebook saifesinde derc etti.

«Bunı kösterdiñiz ki, bir de bir adalet ve insaniyetlikke endi iç bir kimseniñ ümüti qalmağan memlekette devlet öz vatandaşlarını tüşüne ve qorçalamağa bile. Siz memleketimiz – Ukraina içün – ğurur ve eminlik, ümüt berdiñiz, yalıñız apiste yatqanlarğa degil, özüni Ukraina vatandaşı olaraq is etken insanlarğa da!», – dep yazdı Ahtem Çiygoz ve ukrain ombudsmenine muvafaqiyetler tiledi.

Mart 17-de işğal etilgen Qırımnıñ apishanelerinden 12 mabus esas Ukrainağa berildi.

12 Ukraina vatandaşı 2014 senesi mart 18-den evel, Rusiyeniñ Qırım işğalinden evel, ukrain mahkemeleri tarafından mahküm etilgen edi. Olar esas Ukrainada cezasını çekmek istegenlerini bildirgendir.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG