Qıbrız Maarif ve medeniyet nazirligi Qırımdan ve Donbassta Ukrainanıñ nezaretinde olmağan yerlerden köçken ailelerniñ balalarnı raatlıqqa qabul etmege azır olğanını bildirdi. Bunı Ukraina Tasil ve ilim nazirliginiñ matbuat hızmeti bildire.
Ukraina nazirliginde qayd ettiler ki: «Qıbrız Cumhuriyetiniñ Maarif ve medeniyet naziri Costas Kadis, Ukrainadan vaqıtınce köçken balalarnı, onıñ Nazirligi reberliginde teşkil etilgen yazlıq lagerlerine qabul etmege azır olğanını bildirdi».
Keçken sene Karpatı dağlarında köçkenlerniñ balaları içün hayriye lageri açılğanı aqqında haber etilgen edi.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
