Keriç köpüri qurucılığınıñ yanında arheologlar er kişiniñ başı şekilinde terrakot eykeliniñ balaban parçasını taptılar – tahmin etkenlerine köre, bu eski yunan putınıñ başı olmaq mümkün. Bu aqta mart 22 künü «Qırım köpüri» matbuat merkezi haber ete.
Matbuat hızmetinde, bu parça milâttan evel devirge ait olğanını bildirgen Rusiyeli ekspertniñ sözlerini ketireler.
Rusiye ilimler akademiyasınıñ arheologiya İnstitutınıñ deñizaltı taqımınıñ yolbaşçısı Sergey Olhovskiy: «Bizim malümatlarımızğa köre, Qara deñizniñ şimaliy bölgesi içün bu tapılma unikal, oña oşağan şey şimdige qadar tapılmağan edi. Amelde o nasıl çalışqanı, kim tarafından ve ne vaqıt yapılğañıñı ögrenmek içün biz eski yunan sanatı mutehassıslarını celp etecemiz ve balçıq neden ibaret olğanını ögrengenimiz içün labaratoriya talilini yapacamız. Şimdilik bizim tahminlerge köre, terrakot başı Küçük Asiyada yapıldı ve milâttan evel V asırğa ait», – dedi.
Tapılma ne yerden çıqqanı aqqında haber etilmey.
Keriç köpüri qurucılığı yanında eykelniñ başı tapılması ve tapılmanıñ angi devirge ait olğanı başqa iç bir menbada şimdige qadar tasdıqlanmadı.
Mart 16 künü «Qırım köpüri» Keriç köpüri qurucılığınıñ birinci senesi aqqında almanaq çıqardı.
Keriç boğazında köpür qurucılığı aqqında Rusiye prezidenti Vladimir Putin Qırım işğalinden soñ birden ilân etti. Köpürni 2018 senesine qadar qurmağa, 2019 senesi yazda ise çalıştırmağa vade ettiler.
İyül başında «Krımskiy most» haber merkezi Keriç boğazındaki Rusiyeden Qırımğa köpür qurucılığınıñ fiyatı 227,92 mlrd ruble teşkil etkenini bildirgen edi.
Bundan evel Rusiye ükümeti Keriç boğazındaki köpürniñ demir yol qısmınıñ vaqtınca açılmasını bir yılğa qaldırdı – 2018 senesi dekabr ayından 2019 senesi dekabr ayına.
Ukraina tarafı 2014 senesi Qırım işğalinden soñ Rusiye ile köpür qurucılığı añlaşmasından ayırıldı.
