Birleşken Milletlerniñ bölükleri ve Jenevadaki diger halqara teşkilâtlar yanında olğan Ukrainanıñ daimiy vekili Yuriy Klymenko Birleşken Milletlerniñ insan aqları şurasınıñ prezidentini işğal etilgen Qırımda Rusiye tarafından yapılğan etnik ayırım aqqında haberdar etti. O, Ukrainanıñ Halqara mahkemede Rusiyege qarşı açtırğan davası aqqında da bildirdi. Bu aqqında diplomatnıñ mart 20-de İnsan aqları şurasında aytqan nutqunda qayd etile.
Onıñ qayd etkenine köre, Ukraina Halqara mahkemege muracaat etip, Rusiyeni işğal altındaki Qırımda er angi millet ayırımından vazgeçmege, ukrain ve qırımtatarlarğa siyasiy ve medeniy basqı yapmamağa, em de «qırımtatarlarnıñ qaçırılmasını toqtatmağa ve bugünge qadar qaçırılğan insanlarnı tapmağa» mecbur etecek acele tedbir almağa rica ete.
Yanvar ayında Ukraina Rusiye Terrorizmniñ maliye etilmesi ile küreş halqara konventsiyası ve Er angi millet ayırımınıñ şekillerini yoq etüv halqara konventsiyasını boza dep, Birleşken milletlerniñ Halqara mahkemesinde Rusiyege qarşı dava açtırdı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
