Rusiye işğal etken Qırımğa yaqın Herson vilâyetinde yarımadağa yayınlanğan ukrain radioları aqqında bilbordlar peyda oldı. Bunı Qırım.Aqiqat mühbiri haber ete.
Bilbordda Herson vilâyetiniñ bir qısmı ve Qırım haritası bar, ve böyle sözler yazıla: «Ukrain dalğalarına qoşulıñız». Bunıñnen beraber, levhada Qırım ile memuriy sıñırdaki Çonğar köyü yanında qurulğan qulle sayesinde yayın yapqan radiolarnıñ adları qayd etile.
«Nevbetteki adım – televizion yayınları», – dep yazıla bilbordda Herson vilâyeti devlet memuriyetiniñ reisi Andrey Gordeyevniñ sözleri.
Herson vilâyeti devlet memuriyetiniñ iç ve haber siyaseti meseleleri departamentiniñ müdiri Olga Savenkonıñ Qırım.Aqiqatqa bildirgenine köre, malüam Herson vilâyeti ve yerli rayon devlet memuriyeti, em de göñülliler tarafından yerleştirildi.
«Maqsadımız – bu dalğalarnı, ukrain yayınlarını, inkişaf ettirmek. İnsanlar neni ve qayda qıdıracağını bilsin dep», – dep qayd etti o.
Malüm olğanı kibi, Çonğardaki teleradio qullesi Herson vilâyetiniñ cenüp rayonları ve işğal etilgen Qırımğa yayın yapmağa başladı.
2016 senesi dekabr 27-de Ukraina tele ve radio yayınları meseleleri milliy şurası Qırımğa yayın yapa bilecek dört radioğa litsenziya berdi. Bular – Ukrain radiosı (cemaat yayını), Herson radiosı, «Meydan» qırımtatar radiosı, «Qırım cemiyetleriniñ radiosı».
Qırım.Aqiqat Radiosınıñ yayınları içün litsenziya 105.9 FM dalğasında «Qırım cemiyetleriniñ radiosı» cemaat teşkilâtına berildi.
FM-diapazonındaki yayınlar Canköy ve Or Qapı rayonını, em de Aqmescit rayonınıñ bir qısmını qavrap alacaqtır.
