Kremlniñ kontrol etken Aqmescitteki Demir yol rayon mahkemesi mart 20 künü Qırımlı jurnalist, Radio Svobodanıñ muellifi Nikolay Semena davası boyunca toplaşuvnı başqa künge qaldırdı. Qırım.Aqiqat muhbiri haber ete ki, mahkemeniñ keçiktirilmesine sebep – imaye tarafını mahkeme ketişatı açıq keçmesi içün muracaat etkeni oldı.
Bütün istegen jurnalistler salonğa kirip olamağanı sebebinden, advokat Aleksandr Popkov mahkeme toplaşuvını büyükçe salonda keçirmege muracaat etti.
Ondan da ğayrı, o ve zenaatdaşı Emil Kurbedinovke iş içün şarait yaratılmağanını qayd etti – onıñ sözlerine köre, vesiqalarnı yerleştirmek içün yer yetirli degil, qabaatlanğanda ise öz vesiqalarınen çalışmaq içün masa bile yoq.
Prokuror Svetlana Urdinskaya böyle muracaatlarğa qattı itiraz bildirdi ve bunı «advokatlarnıñ nazlanması», em de «mahkemege sayğısızlıq» kibi tanıttı. Ondan da ğayrı «kelecek sefer imayeciler töşekke qave talap etecegini» dedi.
Emil Kurbedinovnıñ fikirine köre, mahkeme toplaşuvını küçük salonda keçirmek qararı tesaddüfiy degil edi, onıñ sözlerine köre, bu «Qırımda rezonanslı siyasiy davalar içün çoq rast kelgen amel».
Mahkemeci Nadejda Şkolnaya, mahkeme toplaşuvında ses qaydı yapılması aqqında muracaat etilgeni sebebinden aletlerni başqa salonğa keçirmek içün çoq vaqıt kerek olacağını, ve başqa sefer daa uyğun yer seçilecegini ayttı. Öz fikirlerini o imayeniñ muracaatından eval seslendirgeni içün, aynı teklifnen muracaatnı red etip olamadı.
Neticede o Mahkeme toplaşuvını aprel 3 künü saat 14-ke tain etti.
2016 senesi baarde Qırımda Qırım.Aqiqat ile işbirliginde şeklengen jurnalistlerniñ evlerinde tintüvler olıp keçti. Nikolay Semenağa qarşı Rusiye Federatsiyasınıñ topraq bütünligini bozmaq çağıruvları şeklenmesi ile cinaiy iş açıldı. Rusiye taqiqatı oña yarımadanı terk etmege yasaq etti.
Dekabr 7-de taqiqatçı jurnalist Nikolay Semenağa Rusiye Ceza kodeksiniñ 280.1 maddesiniñ 2-nci qısmındaki «Rusiye Federatsiyasınıñ topraq bütünligini bozacaq areketlerge açıq çağıruv yapması» ile qabaatlanğanını aydınlattı. Taqiqatçı tizgen cinaiy iş 6 cılttan ibaret, advokatlar malümatlarnı ögrenmege başlay.
FSB sorğusında Nikolay Semena yazğan işlerinde «fikirini bildirme» aqqını qullandı, dep bildirdi.
Nikolay Semenanıñ advokatları, Halqara ve Avropa jurnalistleri Federatsiyası, em de OSCE ifade serbestligi meseleleri Temsilcisiniñ ofisi, FSBge muracaat etip, onı Qırımdan tedaviylenmesi içün yibermege çağırdı, lâkin müsbet cevap şimdige qadar daa berilmedi.
Ukraina Tışqı işler nazirligi işğal etilgen Qırımda Ukraina vatandaşları, şu cümleden Nikolay Semenanıñ taqip etilmesinden qasevetlengenini bildirip, oña qarşı yapılğa basqını toqtatmağa çağırdı.
