İşğal etilgen Qırımda keçirilgen er angi talimler qanunğa zıt kele. Bunı Ukraina Silâlı quvetleri Baş ştabınıñ cemaatçılıq ile alâqalar idaresiniñ zabiti Vladislav Seleznev Qırım.Aqiqatqa bildirdi.
«Bunıñ kibi faaliyet köstermege mesülieti olğan qurulışlarnı ve bu talimlerni nezaret etemiz. Talimler Rusiye Federatsiyası vaqtınca işğal etken topraqta keçirile ve Rusiye Silâlı Quvetleriniñ ava ordusınıñ büyük sayıda askerleri celp etilgeni içün bunı nezaret etemiz», – dep bildirdi Seleznev.
Onıñ aytqanına köre, «Ukraina Baş ştabı Rusiye tarafından yapıla bilecek er angi areketke cevap bermege azır».
«Mütehassıslarımız risklerni baqıp, bölüklerniñ arbiy azırlıq planlarını tüzete ve bu tedbirlerni közete», – dep qoştı Seleznev.
Qırımda mart 20-de Opuk poligonında Rusiye ava ordusınıñ ateşli talimleri başladı. Rusiye Mudafaa nazirligi bildire ki, talimler «Ava ordusınıñ arbiy azırlığı planlarına köre» keçirile. Talimlerde 2,5 biñ Rusiye paraşütçi askeri iştirak ete, 600 dane arbiy tehnika celp etildi.
