Rusiye-Ukraina sıñırı yanında Rusiye tarafından ücüm telükesi yer ala. Bunı Ukraina prezidenti Petro Poroşenko beyan etti.
Mart 20 künü Kyivde, Regional inkişaf şurasınıñ toplaşuvına devlet yolbaşçısı qayd etti ki, bundan sebep Ukrain devleti mudafaağa masraflarnı artırmağa mecbur oldı.
«Qarşımızğa çıqqan vaziyetke tek bir doğru cevabımız bar: 2014 senesi mudafaağa masraflar içki ğayrı safi mahsulatınıñ (İĞSM) 1% teşkil etse, 2016 senesi bütün ğayretimiz ile bu masraflarnı 3,2% qadar ketirdik, ve bu qısım daha artmaq mümkün. Mudafaa ve telükesizlikke umumiy masraflarnı alsaq, olar şimdi ende içki ğayrı safi mahsulatınıñ 5% ziyade oldı», – dedi Poroşenko.
2014 senesi baarde Qırım işğal etilgen soñ, Ukraina şarqında silâlı dava başlandı. Ukraina ve Ğarb Rusiyeni ayırımcılarğa arbiy destek bergeninde qabaatlaylar.Kreml bunı red ete ve Donbassta tek rusiyeli «göñülliler» bulunğanını tanıy. BMT malümatına köre, Donbassta dava başlanğanından 2017 senesi fevral ayına qadar 9,9 biñ insan elâk oldı
