Qırımda Yedi Quyu rayonınıñ sakini Rizvan Abduramanov ğayıp olğanını haber eteler. Bunı Qırım faali Nariman Celâl Facebook saifesinde bildirdi.
«Qırımnıñ Yedi Quyu rayonındaki Arma Eli (Batalnoye) köyüniñ sakini 1968 senesi mayıs 25 künü doğma Abduramanov Rizvan Suleymanoviç noyabr 10-da işke kirmek içün Kefege ketken. Dekabr başında Kefede onıñ vesiqaları tapıldı. Rizvannıñ bulunğan yeri şimdige qadar belli degil», – dep yazdı Celâl.
Bundan evel Qarasuvbazar rayonı Sartana köyüniñ sakini Müdessir İsayev ğayıp olğanını bildirgen ediler. Bir qaç kün evelsi ormanğa ketip qaytmağan erkek aqqında malümat içtimaiy ağlarda tarqatıla.
Qırım aq qorçalayıcı gruppasınıñ malümatına köre, 2014 senesi fevral ayından başlav Qırımda 9 insan qaçırıldı. Olardan beşi qırımtatarı ola. Daa 3 insannıñ qaçırılğanı tahmin etilmekte, amma bunı isbatlağan bir delil yoq.
Aq qorçalayıcılarnıñ fikirince, insanlar siyasiy baqışları ve millet mensüpliginden sebep qaçırıla. Qırım aq qorçalayıcı gruppası tahmin etkenine köre, insanlarnı Rusiye akimiyeti ya da onıñ kontroli altındaki taqımlar qaçıra.
Qırımnıñ sözde akimiyeti insanlar qaçırılğanını tanıy, amma buña alâqası olğanını ve insanlarnıñ qaçırılması Qırım işğalinen razı olmağanlarnı qorquzmaq içün yapılğanını inkâr ete.
