Ukraina ve Türkiye vatandaşlarnıñ ID-kartları boyunca seyaat ete bilmeleri içün añlaşma tizdiler. Mart 14-de Ukraina Nazirler şurasınıñ matbuat hızmeti bildirgenine köre, añlaşma imzalama merasimi Ukraina baş naziri Volodımır Groysmannıñ Türkiye ziyareti çerçivesinde kerçekleştirildi.
Añlaşmağa binaen, ID kartı şeklinde pasport qullanğan Ukraina ve Türkiye Cumhuriyetiniñ vatandaşları Türkiye ve Ukrainada 180 kün içinde 90 kün devamında vizasız qala bilecek, memleketke kire ve çıqa bilecek, em de memleket üzerinden vizasız seyaat ete bilecekler.
Ukraina Nazirler şurasında deyler ki, işbu añlaşma memleketler arasında eki taraflı munasebetlerni inkişaf ettirmege yardım etecek.
Al-azırda Ukraina ve Türkiye arasında vizasız rejim (90 künge qadar) bar.
2016 senesi yanvar 1-den itibaren Ukrainada ID-kartı şeklinde iç pasportları berilmege başladı. Qanunlar kâğıt iç pasportları yerine ID-kartı şeklinde pasport almağa mecbur etmey. Ukraina ükümeti qayd ete ki, adiy pasportlardan ID-kartlarına keçüv Avropa Birligi ile vizasız rejim başlamasına daa bir adım ola.
