Avropa Parlamentinde Rusiye tarafından özünde ve Qırımda qanunsız tutıqlanğan ukrainalı mabuslarınıñ vaziyetinen bağlı rezlütsiyanı qabul ettiler. Avropa Parlamentiniñ vekilleri Rusiyeni – ukrainlerni azat etmege, ve Avropa Birligini – Ukraina vatandaşlarınıñ taqiq etilmesinde qabaatlılarğa qarşı yañı sanktsiyalarnı kirsetmege çağırdılar.
Rezalütsiyağa 451 Avropa deputatı qol tuttı, 73 qarşı çıqtı. 86 Avropa Parlament azaları bitaraf oldı.
Almaniyalı Avropa deputatı Rebecca Harms tarafından azırlanılğan ve Avropa Parlamentiniñ bütün siyasiy taqımları tarafından desteklengen işbu «Rusiyede ukrainalı mabuslar ve Qırımdaki vaziyet» rezolütsiyasında, ayırıca, insan aqlarınıñ bozulmasında qabaatlı olğanlarğa qarşı sanktsiyalar kirsetilmek kerekligi qayd etile.
«Avropa Parlameti insan aqlarınıñ qaba şekilde bozması içün mesuliyetli olğan şahıslarğa qarşı kelecekte de sıñırlayıcı çareler baqılmasına çağıra, şu cümleden AB banklarnda paraları da blok etilmek mümkün», – dap aytıla rezolütsiyada.
Ondan da ğayrı Avropa Parlamenti «AB iştiraginen Qırımnıñ azat etilmesi mevzusında halqara gumanitar uquq, insan aqları ve halqara printsiplerge esaslanacaq muzakerelerni halqara formatta meydanğa ketirmesini rica ete».
AB Şurasına muracaat etip, Avropa Parlamenti «BMT Halqara mahkemesinde Şarqiy Ukrainada terrorizm areketlerinde ve işğal olunğan Qırımda qırımtatar ve ukrainlerniñ taqiq etilmesi ve aqlarınıñ sıñırlanmasında Rusiyeniñ mesuliyetligi aqqında mahkeme davasında Ukrainanı desteklemek içün yollar tapmağa çağırdılar».
Uquq qorçalayıcılarnıñ malümatına köre, bugünki vaziyyete «Kreml mabuslarınıñ» sayısı eñ azından 44 nefer insannı teşkil ete.
