Qırımda Rusiyeniñ taqiqat komitetinde Rusiyeli advokatı Nikolay Polozovnıñ davası aqqında qırımtatar faali İlmi Umerovnı soraştırdılar.
Taqiqatçı uquqiy yardımnıñ kösterilmesinen meraqlandı.
«Taqiqatçını meraqlandırğan sual: Polozov maña uquqiy ve adliyeviy yarıdım berdimi ve bu yardımnıñ kösterilmesi aqqında añlaşmamız barmı... Men, 2016 senesi iyün ayında añlaşma imzalağanımıznı ayttım. Ondan da ğayrı Nikolay maña yardım köstergeninen bağlı bir qaç misal ketirdim», – dep yazdı Umerov.
Dekabr 20-de Qırımda advokat Nikolay Polozovğa qarşı cinaiy iş ğayrıdan açıldı. Uquq qorçalayıcılar Rusiye uquq qoruyıcı sistemasınıñ bu areketleri Polozovnı «Umerovnıñ işinde» imayeci vazifesinden ayırmaq içün yapıla, dep tüşüne.
Kreml tarafından kontrol etilgen Qırım Yuqarı mahkemesi fevral 14 künü advokat Nikolay Polozovnıñ Aqmescitteki Kiyev rayon mahkemesiniñ mahkemecisi Viktor Mojelânskiyniñ Rusiye FSB taqiqatçısı İgor Skripkağa onı «Umerovnıñ işinde» şaat olaraq sorğuğa çekmege ruhseti sebebinden bergen şikâyet arizasını red etti.
Birinci instantsiya mahkemesiniñ qararı deñştirilmedi. Böylece, Qırımnıñ Yuqarı mahkemesi yanvar 25-de Polozovnıñ FSB hadimleri tarafından yaqalanmasını qanunğa uyğun dep tanıdı.
Polozovnı «Umerovnıñ işinden» ayırılması mahkeme toplaşuvlarınıñ ketişatına tesir etmek mümkün. Öyle fikirini qırımtaar milliy areket iştirakçisi İlmi Umerov seslendirdi.
