Sırbistan radikal firqasınıñ deputatları mart 19-21 künleri halqara parlament eyyetiniñ erkânında Qırımnı ziyaret etecek olalar. Bunı firqanıñ Belgrad şeer şurasınıñ reisi Milyan Damyanoviç «RİA Novosti Krım» Qırım neşirine bildirdi.
«Sırbistannıñ radikal firqasını Qırımda professor Milovan Boyiç, Dubravko Boyiç ve SRF kollegiyasınıñ azası Aleksandr Şaşel temsil etecekler», – dep bildirdi Demyanoviç.
Onıñ aytqanına köre, ziyaret programması ve iş körüşüvleri daa muzakere etilmedi.
Qayd etile ki, ziyaret «Qırım referendumınıñ» yıllığına bağışlana.
Ukraina Tışqı işler nazirligi bildirgenine köre, çetel eyyetleriniñ Qırım ziyaretleri resmiy sayılmay. Ukraina nazirligi iyül 25-de muracaatını aydınlatıp, çetel vatandaşları ve vatandaşlığı olmağan insanlarnı Qırımnı qanunsız alda ziyaret etmekten vazgeçmege çağırdı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
