Qırım uquq qorçalayıcı taqımınıñ koordinatorı Olga Skripnik dey ki, işğal olunğan Qırımnıñ memuriy sıñırında Rusiye FSB hadimleri eki sıñır arasında onı ve Ukraina ombudsmeni ofisiniñ temsilcisini tutqan soñ, olarnen ne yapacağını bilmedi ve Rusiye qanunlarını bozdı. Bunı Skripnik mart 14 künü «Hromadske radioı» efirinde tarif etti.
«Umumen, olar qullanmağa tırışqanları Rusiye qanunlarını aqqında aytsaq bile, olarnı da bozdılar, çünki bizlerni üç saatten ziyade tuttılar. Meselâ, memuriy tutuluv aqqında aytsaq, o üç saatten çoq devam etmek mümkün degil, bizlern ise yedi saat tuttılar. Ve biznen ne yapmaqlarını tüşünip, fikirlerini ep deñiştire ediler», – dep tarif etti Skripnik.
Uquq qorçalayıcınıñ sözlerine köre, olarnıñ ziyaretinden evel Rusiye tarafı Rus bayrağını aldı ve ne yerde Rusiyeniñ nezaret etken toprağı başlanğanını añlamağa mümkün degil edi.
Mart 13 künü aqşam Ukraina ombudsmenini kâtibiyetiniñ başı Bogdan Kriklivenko, Qırımnıñ memuriy sıñırında Rusiye FSB tarafından tutulğan ukrainalı uquq qorçalayıcılar Ukrainanıñ kontrolinde olğan yerde bulunğanını bildirdi.
Mart 13 künü kündüz Qırımnıñ memuriy sıñırında uquq qorçalayıcılar taqımı tutulğanı aqqında haber etildi, olarnıñ arasında Olga Skripnik ve «Kalançak» kiriş-çıqış noqtasında Ukraina ombudsmeni ofisiniñ temsilcisi bar edi.
Ukraina Yuqaru Şurasınıñ insan aqlarında vekâletlisiniñ ofisinde, hadimlerinden biri uquq qorçalayıcılar taqımınen beraber Qırımnıñ memuriy sıñırında Rusiye tarafından işğal etilgen Qırım tarafında bulunğanını tasdiqladılar, amma adını bildirmege razı olmadılar.
Ukraina Devlet sıñır hızmetiniñ matbuat kâtibi Oleg Slobodân Qırım.Aqıqatqa, mart 13 künü Qırımnıñ memuriy sıñırında tutulğan uquq qorçalayıcılar «Kalançak» kiriş-çıqış noqtasını resmiy şekilde keçkenlerini haber etti.
Qırım Rusiye nezaretine keçkeninen FSB yarımadada muntazam surette tintüvler keçire, jurnalist, faaller, cemaat erbapları sorğulana, qırımtatar vatandaşları yaqalana. Uquq qorçalayıcılar bunı «farqlı fikirlerge qarşı küreş» kibi köreler.
Ukraina Tışqı işler nazirligi, işğal etilgen Qırımda ukrain vatandaşlarınıñ taqip etilmesinen raatsız olğanını bildirdi ve basqılarnı toqtatmağa çağırdı.
