Link açıqlığı

 «Çiygoz davasınıñ» mahkemesinde üçünci gizli şaat sorğuğa çekildi – advokat


Kreml nezaretindeki Qırım Yuqarı mahkemesinde «Çiygoz davasınıñ» 89-cı toplaşuvında prokuror, üçünci gizli şaatını taqdim etti, onıñ taqma adı Asanov Asan Asanoviç oldı. Taqiqatnıñ malümatına köre, şaat 2014 senesi Qırımtatar Milliy Meclis prezidiumnıñ azası edi ve fevral 25 künü onıñ toplaşuvında bulunğan, bunı advokat Nikolay Polozov Facebook saifesinde haber etti.

«Fevral 26 künü şaat Çiygoznı anda körgen eken, sanki o anda arttaki sıralarda keçip, işaretlep birşeyler ayta edi, bundan soñ ise miting iştirakçileri faat olıp çeşit areketler yapıp başlay ekenler. O bir qaç kelime seslengen, şu cümleden, bese-belli, «Russkoye yedinstvo» ve «opolçeniye» tarafındaki miting iştirakçilerine qarşı, «olarnı mından almağa kerek» dep aytqan», – dedi advokat.

Polozovnıñ aytqanına köre, Çiygoznıñ imayesi öz suallerini berdi, amma bulardan çoqusına şaat «hatırlamayım» ve «bilmeyim» dep cevap berdi.

Öyleden soñ mahkemede şaatnıñ sorğulaması devam etti.

Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, şu cümleden «Rus Birligi» firqası, miting iştirakçilerine qarşı çıqqan edi.

Rusiye mahkemesi iyül 20-de qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.

XS
SM
MD
LG