Link açıqlığı

«E Merkezine» çağırılğanımnıñ sebebi – Mecliste azalığıma çaquv – Celâl


Nariman Celâl

Qırımtatar milliy areket iştirakçisi Nariman Celâl, 2016 senesi küzde «112 Ukraina» kanalında çıqqan yayınğa atıf ile yapılğan çaquv sebebinden ektremizmge qarşı küreş merkezine çağırıldı. Yayın devamında, alt yazıda, Celâl Qırımtatar Milliy Meclis reisiniñ muavini olaraq tanıtılğan edi. Bunı Qırım.Aqiqatqa faalniñ özü bildirdi

«Men anda Meclis reisiniñ muavini olaraq tanıtılğan edim. Bu munasebetnen o («E Merkezine» çaqqan kişi – QA) dey ki, men Meclisniñ, yasaq etilgeb teşkilâtnıñ, azı olam, ve demek ki, maña qarşı, ektremistik cemiyette iştirak etkenim sebebinden, Rusiye Federatsiyasınıñ cinaiy kodeks maddeleri qullanılmaq kerek. İşbu beyanqa dair ifadelerimi almaq içün, ekstremizmge qarşı küreş Merkeziniñ hadimi meni çağırttırdı», – dedi Celâl.

Faaliyetçi öz ifadelerini berdi. Bundan soñ, başqa odada Celâldan Marlen Mustafayev ve onıñ evi yanında yaqalanğan diger 10 adam ile olğan munasebetleri aqqında soraştırdılar.

«Sanki men içtimaiy saifemde olardan birisi ile dostlaşam. Menden izaat soradılar, ve men, içtimaiy ağlardaki dostlsrımdan çoqusı ile şahsen tanış olmağanımı añlattım», – dep qoştı cemaat faali.

Celâl «E Merkezinde»tahminen eki saat bulundı, ve devamında kene çağırıla bilecegini ve tartışacağını tüşüne.

Mart 13 künü saba qırımtatar milliy areket iştirakçisi Nariman Celâl, Aqmescitte ektremizmge qarşı küreş merkezine kelgeni aqqında malüm olğan edi.

Fevral 21-de Aqmescit civarında Marlen Mustafayevniñ evinde «ekstremist timsalleriniñ» numayışı davası boyunca tintüv keçirildi. Mustafayevge qoltutqanlar oldı, on insan kelip, er şeyni videoğa çıqara edi. Olarnı da yaqaladılar. Mustafayevni 11 künge, ortaqlarını beş künge qadar apiske aldılar.

2016 senesi aprelde Rusiyeniñ nezaretindeki Qırım Yuqarı mahkemesi işğal etilgen yarımadada Meclisniñ areketini yasaq etti. Dünya cemaatı, Rus akimiyetiniñ böyle areketlerine qarşı çıqıp, qattiyen narazılıq bildirdi. Meclisniñ imayesi Rusiyeniñ Yükek mahkemesine itiraz yolladı, lâkin apellâtsiya mahkemesi de Meclisniñ yasaq etilmesine qol tuttı.

Ukraina Tışqı işler nazirligi, işğal etilgen Qırımda ukrain vatandaşlarınıñ taqip etilmesinen raatsız olğanını bildirdi ve basqılarnı toqtatmağa çağırdı.

XS
SM
MD
LG