Link açıqlığı

Sudaqta ormanda terekler ruhsetsiz kesilgeni munasebetinen cinaiy iş açtılar


Sudaq orman hocalığınıñ Komsomolsk bölüginde terekler ruhsetsiz kesilgeni munasebetinen Sudaqta cinaiy iş açtılar. Bunı mart 10 künü Kreml nezaretindeki Qırım prokuraturasınıñ matbuat hızmeti bildirdi.

«Mutehasıslarnıñ esaplarına köre, belgisiz şahıslar tarafından yapılğan qanunsız areketler neticesinde 55 terek yoq etildi, bunnen 240 biñ ruble miqdarında zarar ketirildi», – dep haber etile.

Müessisede qayd etkenleri kibi, Rusiye CK 260 maddesiniñ 1, 3 qısımına (ormandaki tereklerniñ ruhsetsiz kesilmesi) bıyunca cinaiy iş açıldı, taqiqatını tabiyat qoruv prokuraturası nezaret ete.

Bundan da ğayrı, orman bölüklerinde bereketli topraqlarnıñ alınılması boyunca taqiqat ögündeki teşkerüv devam etkeni aqqında haber etile.

Keçende Kreml nezaretindeki Qırımnıñ Qarasubazar rayon prokuraturası Qarasubazar orman hocalığınıñ Sartana (Uçelnoye) ormancılıq bölüginde ruhsetsiz terek kesilmesini ortağa çıqarğan edi. 11 terek yoq etildi, ve bunen 150 biñ ruble miqdarında zarar ketirildi.

Fevralnıñ soñunda işğal etilgen Qırımnıñ Saq rayonında Kreml nezaretindeki Qırım ekologiya ve tabiat resurslar nazirliginiñ teftişçileri, qoruma orman yolağında kütleviy şekilge terekler kesilgenini meydanğa çıqarğan edi.

XS
SM
MD
LG