Ukraina tarafı BMT Halqara mahkemesini Qırımda ukrain ve qırımtatarlarnı qorumaq içün tedbir almağa çağırdı. Bunı mart 8 künü öz çıqışında Ukraina eyyetiniñ yolbaşçısı, Ukraina Tışqı işler naziriniñ müavini Yelena Zerkal dedi.
«Ukraina vatandaşlarına zarar ketirgen adiselerge yol bermemek içün Ukraina sıñırlama çarelerni qullanmağa rica ete. Biz Qırımda qırımtatar ve ukrain cemiyetleri acele surette qorçalanmaq kerek olğanını qayd etemiz, olar zulum ve eziyetke oğraylâr, neticede olarnıñ medeniy kimligi telüke astında bulunmaqta», – dedi Zerkal.
Bundan evel Gaagada Ukraina tarafı, Rusiyeni qırımtatarlarğa zulum yapqanında qabaatlağan edi.
Keçende Rusiye tarafı Gaaga mahkemesinde, Qırımda qırımtatar ve ukrainlerniñ aqlarını bozğanını ve ayırımğa oğratqanını inkâe etti.
Mart 6 künü Halqara mahkemede (Felemenk, Gaaga) – BMT Yüksek mahkemesinde - Ukrainanıñ Rusiyege qarşı mahkeme işi boyunca açıq toplaşuv başlandı. Oturuş devamında endi ukrain tarafı da, rus tarafı da sözge çıqtılar.
Ukraina Halqara mahkemege, iş baqılacaq vaqıtta üküm sürecek muvaqqat tedbirlerniñ alınılması aqqında rica ete.
Bu çareler sırasında – Rusiyeniñ «Ukrainada vatandaşlarğa qarşı terrorizm areketlerini yapqan taqımlarğa» maddiy ve diger destek bermesini toqtatmaq, ve bu taqımlarğa artıq böyle areketler yapmamaları içün tesir etmesini, em de Qırımda diskriminatsiyadan vazgeçmege, ayrıca, Qırımtatar Milliy Meclisi ve onıñ faaliyetini yasaq etmemesini ve ğayıp olğan qırımtatarlarnıñ taqiqatını alıp barmasını talarp etmek.
