Kyivde mart 17-de «Mustafa Cemilev. Mazun olmağan» kitabınıñ taqdim merasimi keçirilecektir. Kitap müellifleri «Ukrainskaya pravda» neşiriniñ baş muarriri Sevgil Musayeva-Borovik ve «KrımSOS» cemaat teşkilâtınıñ esasçılarından biri Alim Aliyev olalar.
«Kitap olacağını tüşünmegen edik. Birinci körüşüvimiz (Mustafa Cemilev ile – QA) Donbassta cenk tedbirleri başlağan soñ oldı, intervyü basacaq edik, amma neşriyattan bir muracaat keldi, bizler tercimeiyallı bir kitap degil, Qırıda işğalden soñ neler ola ve Cemilev özü ne yapqanını yazmağa qarar aldıq», – dep tarif etti Qırım.Aqiqatqa Musayeva-Borovik.
Kitapta baş qaramannıñ intervyüları ile beraber qırımtatar milliy areket iştrakçileri ve sovet dissidentlerniñ baqışları, em de Qırımnıñ şimdiki vaziyeti aks ettirilgendir
«Anda eki parallel sızıq bar – Cemilevniñ ayatı ve yarımada ayatı, qırımtatarlarnıñ işğalden soñ vaziyeti. Qırımtatar milliy areketinen bağlı çoq malümat da bar, areket qaramanları, sürgünlik ve qırımtatarlar üzerinde olğan esnaslar bar. Kitap qırımtatarlarnıñ tarihınen tanış ete», – dep qoşştı Musayeva-Borovik.
«Mustafa Cemilev. Mazun olmağan» kitap eki tilde – rusça ve ukraince çıqa, cemi 7 biñ nushası bar.
Oquyıcılarğa kitap «Knijnıy arsenal» halqara festivalinde taqdim etilecektir.
Mustafa Cemilev – qırımtatarı, SSCB zamanınıñ ve Ukrainanıñ siyasiy ve cemaat erbabıdır. Qırımtatar milliy areketiniñ reberlerinden birisi, uquq qorçalayıcı, dissidentler areketininiñ iştirakçisi, siyasiy mabus, Ukraina halq deputatı, 2014 senesi avgust 20-den başlap Ukrana prezidentiniñ qırımtatar halqı işlerinden vekâletlisidir.
2014 senesi mart 20-de Ukraina Yuqarı Radası qırımtatarlarnı Qırımnıñ tamır halqı olaraq tanıdı. Bu qararğa 283 deputat rey berdi. Ukraina qırımtatar halqınıñ Ukrainanıñ tamır halqı olaraq etnik, medeniyet, til ve din kimliginiñ saqlap qalması ve inkişafını kefil etmektedir.
