Link açıqlığı

Moskvada Bağçasaray aqqında foto-sergi açılacaq


Bağçasaray, tasviriy fotoresim

Mart 9 künü Rusiye devlet sanat kitaphanesinde (Moskva ş.) «Fotokameralarınıñ obyettivlerinde Bağçasaray abideleri, 1910-cı seneler» adlı foto-sergi açılacaq. Bunı Kreml nezaretindeki Qırım medeniyet nazirliginiñ matbuat-hızmeti bildire.

«Foto-sergi Bağçasaray müzeyiniñ 100 yıllığına, onıñ tesisçisi ve birinci müdiri Usein Bodaninskiyniñ 140 yıllığına, Rusiye devlet sanat kitaphanesiniñ 95 ve onıñ tesisçisi Aleksandr Fominniñ 150 yıllığına bağışlanğan leyhanıñ esas vaqıyası olacaq. Sergide Bağçasaray tarih-medeniyet ve arhiologiya müzey-qoruğınıñ fondlarından 50 foto-vesiqa numaiş etilecek», – dep haber ete matbuat hızmeti.

Bu sergi içün Politehnika müzeyi keçken asırnıñ başına ait fotokameralarnı, resim müelifleri ihtimalnen qullanğan alet ve cihazlarını ilk kere taqdim etecek.

Leyha çerçivesinde bir sıra tedbirler ötkerilecegi belgilene: Bağçasaraynıñ qurucılığı ve mimarcılığı aqqında lektsiyalar, qırımtatar edebiyat aqşamları, efsaneviy qaraman Alimniñ obrazına bağışlanğan filmniñ numayışı. 1916 ve 1926 senelerge ait filimlerni Rusiye Devlet Film fondı ve kollektsioner Nizami İbraimov berecekler.

Teşkilâtçılarnıñ bildirgenlerine köreü, sergi 2017 senesi mart 23 kününe qadar ziyaretler içün açıq olacaq.

XS
SM
MD
LG