Qırımdaki mahkeme Bağçasarayda qırımtatarlarnıñ evlerinde olıp keçken tintüvlerniñ şaatı Osman Belâlovnıñ şikâyet arizasını taqdirlemedi. O, qanunsız kütleviy aktsiyalarnıñ iştirak etmesi ile qabaatlana. Bunı Qırım faali Anna Bogaçeva Facebooktaki «Qırım birdemligi» saifesinde bildirdi.
«Mahkeme şikâyet arizasını qanaatlendirmedi, qarar deñişmesiz qaldı», – dep yazdı Bogaçeva.
Yanvar soñunda Bağçasaraydaki mahkeme Osman Belâlovğa 10 biñ ruble miqdarında para cezasını berdi.
Bildirile ki, al-azırda aynı ceza qavehane saibi Marlen Asanov ve bir qaç iştirakçi, şu cümleden Enver Şerfiyevge berilgen edi.
Mayıs 12-de Bağçasarayda Rusiye uquq qoruyıcıları musulmanlarnıñ evlerinde ve yerli qavehanede tintüvler keçirdi. Bağçasaraynıñ dört sakini terrorizm ile qabaatlanıp yaqalandı: Zevri Abseitov, Remzi Memetov, Rustem Abiltarov ve Enver Mamutov. Olarnı Rusiyede yasaq etilgen «Hizb ut-Tahrir» teşkilâtında iştirak etmesi ile qabaatladılar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
