Mart 7 künü Kreml nezaret etken Aqmescitteki Kiyev rayon mahkemesinde «Hizb ut-Tahrir davasınıñ» beş mabusı Emil Cemadenov, Uzair Abdullayev, Teymur Abdullayev, Ayder Saledinov ve Rustem İsmailovke apis cezasını üç ayğa arttırmağa qarar alındı. Apis cezası 2017 senesi iyün 11 kününe qadar uzatıldı, bunı Qırım.Aqiqatqa advokat Edem Semedlâyev bildirdi.
«Bunıñ sebebi olaraq – taqiq işi yapıp bitirilmegeni, bir sıra ekspertiza azır olmağanı aytıldı», – dep añlattı advokat.
Mahkeme toplaşuvında üç mabus – Cemadenov ve Abdullayev ağa qardaşları bulundılar, Saledinov ve İsmailov daa psihiatrik ekspertizasında bulunalar, qayd etti o.
Oktâbr 12 künü Qırımda beş musulman ailede tintüvler keçirilgen edi. Tintüvlerden soñ beş qırımtatarı yaqalandı ve Rusiyede yasaq etilgen «Hizb ut-Tahrir» teşkilâtaında iştirak etkenlerinde qabaatlandılar: Rustem İsmailov, Uzair Abdullayev, Teymur Abdullayev, Emil Cemadenov ve Ayder Saledinov.
Fevralniñ soñunda Rustem İsmailov ve Ayer Saledinovnı psikiatrik ekspertizasını keçmege yollağanları aqqında belli oldı.
Bundan evel psihiatrik ekspertizasını Muslim Aliyev, Vadim Siruk, Enver Bekirov, Emir-Usein Kuku, Arsen Cepparov, Refat Alimov, Remzi Memetov ve Enver Mamutov keçtiler.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
