Link açıqlığı

Saatnıñ esas haberi

Qırım ormanında coyulğan üç yaşında oğlançıqnı ekimler baqa


Qarasuvbazar ormanı
Qarasuvbazar ormanı

Qırımnıñ Qarasuvbazar ormanında gece qıdırılğan üç yaşında oğlançıq hastahanege alındı. Bunı faaller bildire.

«RİA Novosti» haber etkenine köre, Qırımnıñ Rusiye taqiqat komiteti bildire ki, mart 4 künü üç kiçik bala ana-babası olmağanda Qarasuvbazar rayonınıñ Köktaş köyü civarındaki Beymurza özenine taba ketip, aqbardaq cıyacaq ediler. 30-40 daqqadan soñ balalar üç yaşındaki oğlançıqnı coydı ve evge qaytıp, bunı ana-babasına ayttılar, olar ise faal, qurtarıcı ve uquq qoruyıcılarnı celp ettiler.

Bir qaç saatten soñ oğlançıq Köktaş köyünden 3 km uzaqlığında dağ yolunıñ çetinde tapıldı.

«Al-azırda bala «umumiy üşütme» diagnozınen «Qarasuvbazar merkeziy rayon hastahanesine» alındı, sağlığı stabil olaraq belgilene. Oña qarşı zorbalıq areketleri yapılğanını köstergen bir de bir alâmetler yoq», – dep bildirildi.

Alim Aydamak qullanıcısınıñ videosı

Mart 4-de aqşam Facebookta üç yaşında bala ğayıp olğanını haber ettiler. Oğlançıq Qırımnıñ Qarasuvbazar rayonı Köktaş köyüne yaqın ormanda coyuldı.

Qasaba sakinleri ve lâqayt qalmağanlar balanı qıdırmağa keldi. Rusiye Fevqulâde vaziyetler nazirliginiñ Qırım idaresi bildire ki, vaqia yerine qıdıruv-qurtarıcı hızmetleriniñ küçleri ve vastaları yollanıldı – 212 insandan ibaret taqım şekillendirildi.

XS
SM
MD
LG