Ukraina musulmanları diniy idaresi kontrol etmegen Herson vilâyetindeki Geniçesk rayonınıñ Partizanı ve Sçastlivtsevo köyleriniñ cemiyetleri Türkiyedeki qırımtatar diasporasından para alıp camiler quracaq. Bunı Geniçesk rayon devlet memuriyeti yolbaşçısınıñ muavini Gülnara Bekirova Qırım.Aqiqatqa bildirdi.
«Eki cami içün topraq berildi. Sçastlivtsevo ve Partizanıdır. Olarnıñ maqsadını resmiyleştirdik. Derneklerimiz bir qaç kere kelgen edi», – dep ayttı o.
Bekirovanıñ bildirgenine köre, diaspora vekilleri yerli qırımtatarlarnen körüşken soñ cami qurucılığınıñ maliye etilmesi aqqında qarar tasdıqlandı.
Regional meclis faali Nariman Ablâzovnıñ Qırım.Aqiqatqa bildirgenine köre, cami qurucılığınıñ leyhaları mart soñuna qadar azır olacaq.
Onıñ qayd etkenine köre, camiler Geniçesk rayonınıñ Partizanı ve Sçastlivtsevo köyleriniñ cemiyetlerine ait olacaq. Olar Ahmad Tamim yolbaşçılığında Ukraina musulmanları diniy idaresine kirmey.
«Habaşiler (UMDİ vekilleri – QA) camilerniñ qurulmasını istemey. Musulmanlar dindaşları ibadet etecek evniñ qurucılığına ne içün qarşı çıqqanını añlamaq zor», – dep qoştı Ablâzov.
Regional meclis reisi Lenur Lümanovnıñ aytqanına köre, cami qurucılığı içün leyha vesiqalarını azırlaycaq şirket belgilendi.
«Leyha üzerinde yerliler, «Tavriya» kooperativi çalışa», – dep ayttı o Qırım.Aqiqatqa.
Türkiyede yaşağan qırımtatarlarnıñ maddiy yardımı ile cami qurmaq qararı 2016 senesi yanvar ayında Geniçesk rayonında olıp keçken Dünya qırımtatar kongressi icra şurasınıñ toplaşuvında qabul etildi.
Qırımtatarlar toplu yaşağan Geniçesk rayonınıñ dört qasabasından üçünde ibadet yerlerini Ukrana musulmanları diniy idaresi tarafından nezaret etilmektedir. O ise, «habaşizm» adlı tariqatqa mensüptir. UMDİ-ne kirmegen musulman cemiyetleri 2016 senesi noyabr ayında Kyivde qurulğan Qırım musulmanları diniy idaresiniñ tesisçilerinden ola. Al-azırda Ukraina medeniyet nazirligi yañı Qırım musulmanları diniy idaresini qayd etmektedir.
