Link açıqlığı

Rusiye Federatsiya Şurası Ukraina terkibindeki Qırım haritalarınıñ basılmasını yasaq etmege teklif ete


Rusiye Federatsiya Şurasınıñ azaları Sergey Tsekov ve Olga Kovitidi Devlet dumasına qanun leyhasını teslim etip, reklama ve basma malümatlarında işğal etilgen Qırımnı Ukraina terkibinde köstergen coğrafik haritalarnı qullanmağa yasaq etmege teklif ettiler. Rusiye kütleviy haber vastalarınıñ bildirgenine köre, vesiqa mart 3-de parlament elektron malümat bazasında derc etildi.

Vesiqada aytıla ki, «Reklama» qanunına kirsetilmesi teklif etilgen deñişmeler reklamada yañlış topografik malümatnı (Rusiye Federatsiyasınıñ coğrafik haritaları) qullanmağa yasaq etmekte. İşbu deñişmeler Rusiye topraq bütünliginiñ bozulması teşviqatı olaraq tasnif etilmesi mümkün olğan basma neşir, ders edebiyatı, Rusiye Federatsiyası haritaları ve dersliklerniñ azırlanması ve satılmasını qanun seviyesinde belgilemeknen bağlıdır».

Leyha müellifleriniñ aytqanına köre, al-azırda bir çoq neşriyatnıñ haritalarında qomşu Rusiye terkibinde Qırım subyektleriniñ adları yoq. Olarnıñ fikirince, bu deñişeler «ticaret, turizm, em de basma mallarınıñ azırlanması saalarında reklama faaliyetinde uquq ve etik qaidelerge riayet etilmesini temin etmege imkân berecektir».

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG