Cumaertesi künü, mart 4-de, Qırım faali Marlen Mustafayev apisten çıqtı. Bu aqqında «Qırım birdemligi» birleşmesiniñ Facebook saifesinde aytıla.
Er istegen kişi onı Qırım Yuqarı mahkemesiniñ binası yanında qarşılamağa keldi.
Fevral 21-de Aqmescit civarında Marlen Mustafayevniñ evinde «ekstremist timsalleriniñ» numayışı davası boyunca tintüv keçirildi. Mustafayevge qoltutqanlar oldı, on insan kelip, er şeyni videoğa çıqara edi. Olarnı da yaqaladılar. Mustafayevni 11 künge, ortaqlarını beş künge qadar apiske aldılar.
Qırımtatar Milliy Meclisiniñ reis muavini İlmi Ümerov Qırımdaki yaqalav ve apis cezalarını «qorquzuv aktsiyaları» dep adlandırdı.
Ukraina Tışqı işler nazirligi zapt etilgen Qırımda Ukraina vatandaşlarına qarşı basqı ve taqip areketleri yapılğanından raatsız olğanını defalarca bildire edi, bundan da ğayrı, Rusiyeni yerli sakinlerge basqılarnı toqtatmağa ve ukrainalı siyasiy mabuslarını azat etmege çağıra edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
