Link açıqlığı

Saatnıñ esas haberi

Dünya Ukrainler kongressi dünyanı Qırım sebebinden Rusiyege basqı köstermege çağırdı


Dünya Ukrainler kongressi, Dünya cematına Qırım işğali aqqında malümat bere ve Rusiye Ukrainağa qarşı yapqan zulumı sebebinden oña nisbeten basqını devam etmege çağırdı. Bunı mart 2 künü Brükselde Dünya Ukrainler kongressiniñ prezidenti Yevgen Çoliy bildirdi.

«Halqara strukturalarını, insan aqlarını qorçalağan çeşit teşkilâtlarnı, ondan da ğayrı ukraina diasporası yaşağan devletlerniñ akimiyetlerini insan aqları bozulğanı meselesini kötersinler dep çalışamız. Sadece çağıruvlarnen degil, çünki boş çağırmalar prezident Putin qulaq asmay. Bunnen beraber sanktsiyalarnen bağlı mütenasip basqı köstersinler. Dünya cemaatı insan aqları bozulğanına köz yummacağını ve mustaqil devletlerniñ topraqlarına toqunuvnı qabul etmecegini köstermek içün», – qayd etti Yevgen Çoliy.

DUK prezidenti dey ki, o Rusiyeniñ Qırımdaki yapqan areketlerini Ukrainanıñ siyasetine tesir etmek içün Rusiyeniñ bir usulı olaraq köre.

«Evel Rusiye Ukrain siyasetine tesir etmek içün gaz meselesini qullana edi, amma Maydandan soñ başta Qırımda, soñ ise Ukrainanıñ ğarbında arbiy küç qullandı», – qoştı o.

Fevral 21 künü Dünya Ukrainler kongressi Brükselde temsilciligini açtı. Kongress, Ukrainanıñ menfaatlarını AB, NATO ve başqa teşkilâtlarda ögge sürecektir.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG