Varşavada fevral 28-de Rusiye elçihanesiniñ yanında Qırımnıñ siyasiy mabusları ile birdemlik piketi olıp keçti, bunı «Ukrinform» bildire.
Aktsiya teşkilâtçısı, Dünya qırımtatar kongressi İcra şurasınıñ azası Nedim Useinovnıñ aytqanına köre, aktsiya ukrain, qırımtatar ve lehlerni topladı.
«Qırım işğaliniñ üçünci yılı olğanına baqmadan, bizler, qırımtatarlar, ukrainler ve bütün dünyada olğan dostlarımız azat Qırım, Ukraina terkibindeki Qırım oğrunda küreşimizni toqtatmaycaqmız», – dep ayttı o.
Poloniyadaki ukrainler birleşmesiniñ reisi Petr Timanıñ fikirince, bugünde-bugün «er kes qırımtatarı olmalı» ve işğal etilgen Qırımda taqip etilgen, apiste yatqan ve milliy medeniyetini ve kimligini coymaq telükesi altında olğanlarğa birdemlik köstermeli.
Fevral 26 künü Ukrainada «Qırımnıñ Rusiye işğaline qarşılıq kösterme künü» olaraq belgilendi. Aynı şu künü 2014 senesi Qırım Yuqarı Şurasınıñ binası yanında Ukraina topraq bütünligine qoltutuv mitingi olıp keçti. Miting iştirakçilerine qarşı Rusiyege qoltutqan faaller, şu cümleden «Rus birligi» firqasınıñ vekilleri çıqqan edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
